Musanze: Abagera kuri 88 Bari Gukarishya Ubumenyi ku Icungamutungo, Imikoreshereze y’Imari n’Imicungire y’Ubucuruzi

Abagera kuri 88 baturuka mu matsinda 15 yo mu turere twa Gicumbi, Rulindo, Gakenke, Burera na Musanze bari mu mahugurwa y’iminsi ibiri ari kubera mu Murenge wa Muhoza mu Karere ka Musanze, agamije kubongerera ubumenyi mu bijyanye n’icungamutungo, imikoreshereze y’imari ndetse n’imicungire y’ubucuruzi.

Aya mahugurwa yateguwe kubufatanye hamwe na   UGAMA na  Heifer International Rwanda  binyuze mu mushinga wa PRISM. Ahawe amatsinda ndetse n’amahuriro yamaze guhabwa amahugurwa y’ibanze, hagamijwe kuyategura kwimuka ava ku rwego rw’amatsinda ajya ku rwego rwa koperative zemewe n’amategeko.

Intego nyamukuru y’aya mahugurwa ni uguha aya matsinda ubufasha bwa tekiniki bubafasha kunoza imikorere ya buri munsi, kubika neza inyandiko z’imari n’umutungo, gufata ibyemezo bimurikiwe kumikoreshereze y’imari no guteza imbere ibikorwa byabo mu buryo burambye.

Abitabiriye amahugurwa bari guhugurwa  kandi ku buryo bwo gukoresha neza ibitabo by’ibaruramari bigiye bitandukanye ndetse no gutegura raporo z’imari.

Hari kandi kwibandwa ku igenamigambi ry’imari, kwizigamira, gucunga imyenda n’inguzanyo, gushora imari, imiyoborere myiza ya koperative, uburyozwacyaha n’ubumenyi mu kwamamaza ibikorwa byabo hakurikijwe amategeko agenga amakoperative mu Rwanda.

Abafashamyumvire na bo bari guhabwa ubushobozi mu  gukomeza kugeza ubumenyi ku bandi bifashishije uburyo buzwi nka Knowledge Transferring Circuit (KTC).

Abitabiriye aya mahugurwa bavuga kandi  ko azabafasha kunoza imicungire y’umutungo no kwitegura kuba amakoperative arambye azamura imibereho y’abanyamuryango ndetse n’iterambere ry’uturere bakomokamo n’igihugu muri rusange.